အလွယ်ဆုံးနည်းလမ်းတွေသုံးပြီး အင်္ဂလိပ်စာကိုလေ့လာကြမယ်

ဂလိုဘယ်လိုက်ဇေးရှင်းလို့ခေါ်တဲ့ ကမ္ဘာကြီးက ရွာလေးတစ်ရွာ၊ သတင်းအချက်အလက်နဲ့ဆက်သွယ်ရေးနည်းပညာခေတ်ကို ရောက်လာတဲ့အချိန်၊ သူတို့နဲ့ရင်ဘောင်တန်းပြီးလိုက်လာတဲ့ ဘာသာစကားရဲ့အသုံးဝင်မှုကိုလည်းမေ့ထားလို့မရတော့ပါဘူး။

အင်္ဂလိပ်ဘာသာစကားကို ရှေးခေတ်အဘိုးအဘွားတွေ ကိုလိုနီခေတ်ကတည်းကသင်ကြားခဲ့တယ်။ ဒီနေ့ထိလည်း ကျွန်တော်တို့မျိုးဆက်တွေသင်ယူနေရတုန်းပါပဲ။ ဂလိုဘယ်လိုက်ဇေးရှင်းခေတ်မှာ သူများနဲ့တန်းတူပြေးနေရတာဖြစ်လို့ ဘာသာစကားမတတ်ကျွမ်းမှုက ကျွန်တော်တို့တိုးတက်ရေးလမ်းစမှာ အတားအဆီးတစ်ခုဖြစ်လာနိုင်တယ်။ အဲ့ဒါကြောင့် ကမ္ဘာသုံးဘာသာဖြစ်တဲ့အင်္ဂလိပ်စာကို လေ့လာဖို့လိုပါတယ်။

ဘယ်လိုလေ့လာကြမလဲ ?

လေ့လာတဲ့နေရာမှာ ဘာသာစကားသင်တန်းတွေ၊ International school တွေဟာ အင်္ဂလိပ်စာတိုးတက်ဖို့အရမ်းကောင်းတဲ့ source တွေပါ။ ဒါပေမယ့် အဲဒီလိုနေရာတွေမှာ တက်ဖို့ဆိုတာ လူတိုင်းအတွက်တော့မဖြစ်နိုင်ဘူး။ ဘာကြောင့်လဲဆိုရင် သင်တန်းကြေးကြီးမြင့်လွန်းတာရယ်၊ အချိန်ဇယားတွေရယ်ကြောင့်ပါ။ တစ်ချို့က အလုပ်လုပ်ရင်းနဲ့တက်ကြရတာကိုး။ အဲ့ဒီတော့ အင်္ဂလိပ်စာကို လွယ်ကူဆုံးဖြစ်အောင်လေ့လာဖို့အတွက်ဘယ်လိုအရာတွေကအကောင်းဆုံးဖြစ်မလဲ ?

( ၁ ) နိုင်ငံခြားဇာတ်ကားများ

လူတိုင်းသိကြမှာပါ။ နိုင်ငံခြားဇာတ်ကား ( အထူးသဖြင့် အင်္ဂလိပ်၊ အမေရိကန် ) ကားတွေကိုကြည့်ပြီး အင်္ဂလိပ်စကားပြောကိုလေ့လာလို့ရပါတယ်။ နိုင်ငံခြားဇာတ်ကားတွေကို ကြည့်ရင်း ရလာမယ့် အကျိုးကျေးဇူးနှစ်ချက်ရှိတယ်။ တစ်ချက်က စာတန်းမထိုးတဲ့ရုပ်ရှင်တွေထဲက ဇာတ်ကောင်တွေပြောတဲ့ ဒိုင်ယာလော့ဂ်တွေကို အထပ်ထပ်နားထောင်၊ နားရည်ဝလာတာနဲ့အမျှ အင်္ဂလိပ်စာ စွမ်းရည် ၄ ချက် ( 4 Skills English ) ထဲက Listening ( အကြားစွမ်းရည် ) ထက်မြက်လာနိုင်တယ်။ နောက်တစ်ချက်ကတော့ စာတန်းထိုး ( အင်္ဂလိပ်စာသက်သက် ) ရုပ်ရှင်တွေကိုကြည့်၊ နားမလည်တဲ့စာလုံးတွေ၊ အီဒီယမ်တွေ၊ စကားစုတွေ၊ ဗန်းစကားတွေကို လေ့လာလေ့လာရင်းနဲ့ vocabulary ကြွယ်လာနိုင်သလို၊ ဘာသာပြန်တဲ့စွမ်းရည်ကိုလည်းတိုးတက်စေနိုင်တယ်။

( ၂ ) စာအုပ်မျိုးစုံ

မြန်မာလိုရေးထားတဲ့စာအုပ်တစ်အုပ်ကို ဖတ်ရတာကောင်းတယ်။ ဒါပေမယ့် အင်္ဂလိပ်လိုရေးထားတဲ့ အာတီကယ်တစ်ပုဒ်၊ ဝတ္ထုတစ်ပုဒ်၊ စာအုပ်တစ်အုပ်ကို ဖတ်ပြီး နားလည်ရတာက ပိုပြီးအရသာရှိတယ်။ ကျွန်တော်တို့ဟာ အင်္ဂလိပ်လိုရေးထားတဲ့စာအုပ်တွေ၊ ဝတ္ထုတွေဖတ်တာ ကြာလာတာနဲ့အမျှ reading skill တက်လာနိုင်သလို၊ phrase တွေကို ဘာသာပြန်ရတဲ့အတွက် thinking skill တစ်ခုပါတိုးတက်လာစေနိုင်တယ်။ ဖြစ်နိုင်ရင် အင်္ဂလိပ်ဝတ္ထုတွေ၊ စာအုပ်တွေဖတ်မယ်ဆိုရင် English to Myanmar Dictionary တစ်အုပ်ပါထားပြီးဖတ်ရင်တော့ ပိုပြီးလွယ်ကူစေမှာပါ။ နောက်ပြီး Reader’s Digest, Light, The Best, Top English စတဲ့ အင်္ဂလိပ်စာနဲ့ပတ်သက်တဲ့စာစောင်တွေ၊ ဂျာနယ်တွေဖတ်ပြီးလည်း အင်္ဂလိပ်စာစွမ်းရည်ကို အဆင့်မြှင့်တင်နိုင်ပါသေးတယ်။

( ၃ ) အင်တာနက်

အင်တာနက်ပေါ်မှာ ရှိတဲ့အကြောင်းအရာတွေ ( Local domain တွေ၊ ကြော်ငြာတွေ၊ ဗွီဒီယိုဖိုင် ) တွေကလွဲရင် ကျန်တာအကုန်လုံးနီးနီးဟာ အင်္ဂလိပ်လိုပြောထား၊ ရေးထားတဲ့အကြောင်းအရာတွေချည်းပါပဲ။ အဲဒါဟာ အင်္ဂလိပ်စာကိုလေ့လာချင်တဲ့သူတွေအတွက်တော့ သုံးမကုန်နိုင်တဲ့ရတနာသိုက်တစ်ခုဖြစ်ပါတယ်။ ဥပမာ Google Search Engine ဟာ ပုံရှာဖို့အတွက်တင်မဟုတ်ပဲ၊ ကျွန်တော်တို့သိချင်သမျှ စကားလုံးအဓိပ္ပါယ်တိုင်းကို ပုံနဲ့တကွဖော်ပြပေးနိုင်တဲ့ အဘိဓာန်တစ်ခုလို့သတ်မှတ်ကြည့်နိုင်တယ်။ နောက်ပြီး အွန်လိုင်းပေါ်က IELTS course လို သင်တန်းဝက်ဘ်ဆိုဒ်တွေထဲ မှတ်ပုံတင်ပြီး ဝင်ရောက်လေ့လာနိုင်တယ်။ ဂန္တဝင်စကားလုံးတွေကနေ အတိုကောက် abbreviation တွေအထိ အွန်လိုင်းပေါ်မှာရှာနိုင်တယ်။ ဒါတင်မကသေးပါဘူး။ ထင်ရှားကျော်ကြားသူတွေတစ်ယောက်ချင်းစီရဲ့ Quote ( အဆိုအမိန့်တွေ)၊ Biography ( အထ္ထုပ္ပတ္တိ ) တွေကိုလည်းရှာဖွေပြီး ဘာသာပြန်ဖတ်ရှုနိုင်ပါသေးတယ်။ အဲဒီလုအလေ့အကျင့်တစ်ခုဖြစ်လာတဲ့အခါ ကိုယ့်ရဲ့အင်္ဂလိပ်စာစွမ်းရည်လည်းတစ်ဖြည်းဖြည်းတိုးတက်လာလိမ့်မယ်။

( ၄ )  သီချင်းနားထောင်တာ

အင်္ဂလိပ်သီချင်းတစ်ပုဒ်ကို နားကြပ်တပ်နားထောင်ပြီးနားလည်ဖို့ဆိုတာအတော်လေးတော့ မလွယ်တဲ့ကိစ္စတစ်ခုပါ။ နားရည်ဝနေတဲ့သူတွေတောင် Justin Bieber, The Weeknd, Chainsmokers, Avenged Sevenfold, Coldplay, Swedish House Mafia စတဲ့သူတွေ၊ အဖွဲ့တွေရဲ့သီချင်းတွေနားထောင်လိုက်ရင် မျက်စိတွေလည်သွားတတ်တာမဟုတ်လား။ ခက်ခဲတဲ့ပုံစံကနေစတင်ရင်းနောက်ပိုင်းမှာတော့ လွယ်ကူသွားတတ်တာသဘာဝပါ။ တစ်ခုရှိတာက တီးလုံးနဲ့အဆိုတော်အသံကောင်းတယ်ဆိုရုံလေးနားထောင်နေတာမဟုတ်ပဲ သီချင်းအစကနေအဆုံးထိစာလုံးတစ်လုံးချင်းစီကို နှစ်ခါသုံးခါလောက် အချိန်ပေးနားထောင်လိုက်ရင် သီချင်းရဲ့ဆိုလိုရင်း နဲ့ အနှစ်သာရတစ်ခုလုံးကို သဘောပေါက်သွားမှာပါ။ သီချင်းတွေမှမဟုတ်ပါဘူး။ tutorial အခွေတွေ၊ အင်္ဂလိပ်စကားပြောအခွေတွေနဲ့လည်း ကိုယ့်ရဲ့ listening skill ကိုလေ့ကျင့်ယူလို့ရပါတယ်။

( ၅ ) ဂိမ်းတွေ

မှန်ပါတယ်။ ဂိမ်းတွေပါ။ ဂိမ်းမာတွေတော်တော်များများ ( ရဲ့စိတ်ထဲ၊ မှတ်ဉာဏ်ထဲမှာ ) တကယ့်အင်္ဂလိပ်စာဂုရုကြီးတွေတောင် မသိကြတဲ့ ဂန္တဝင်ဆန်ဆန်အင်္ဂလိပ်စာလုံးကြီးတွေရှိနေတတ်တယ်။ နောက်ပြီး ဂိမ်မာတွေဟာ တခြားသူတွေလောက်သာ မသိရင်မသိမယ်၊ အင်္ဂလိပ်စကားထမင်းစားရေသောက်လောက်ကတော့ လက်ရှိဆော့နေတဲ့ဂိမ်းတွေထဲကနေသင်ယူနိုင်ပါတယ်။ Mission Objective နဲ့ဆော့ရတဲ့ First Person ဂိမ်းတွေ၊ Real time Strategy ဂိမ်းတွေ၊ အွန်လိုင်းပေါ်မှာသူငယ်ချင်းတွေနဲ့အတူတူဆော့တဲ့ RPG Role Playing Game တွေရဲ့၊ ဘယ်လိုနေရာကနေမဆို အင်္ဂလိပ်စာကိုလေ့လာသင်ယူနိုင်တယ်။ ဂိမ်းထဲကဇာတ်ကောင်တွေကလည်း အပြင်ကလူတွေနေ့စဉ်ပြောနေတဲ့ထမင်းစားရေသောက်စကားလုံးတွေကိုပြောနေတာဖြစ်လို့ပါပဲ။ အဲဒါကြောင့် ဂိမ်းတွေဆိုတာလည်း အင်္ဂလိပ်စာကို လေ့လာနိုင်မယ့် နောက်ထပ် source တစ်ခုထဲမှာ ထည့်သွင်းလိုက်ပါတယ်။

အင်္ဂလိပ်စာတိုးတက်ချင်၊ လေ့လာချင်တဲ့သူတွေအတွက်ရည်ရွယ်ပါတယ်။