အန္တရာယ်များသော အင်္ဂလိပ်စကား (၂)

ရှောင်ရန်စကားလုံးများ၏ စွမ်းအား

ပုံမှန် သုံးနေကျမဟုတ်တဲ့ စကားတွေကို ရှောင်သင့်ပါတယ်။ ဥပမာ နေ့စဉ် ကျောင်း၊ လုပ်ငန်း၊ မိသားစုထဲမှာ ပုံမှန်ပြောဆို သုံးနှုန်းလေ့မရှိတဲ့ စကားလုံးမျိုးတွေကို ပြောတာပါ။ အချို့သော စကားလုံးတွေမှာ မထင်မှတ်တဲ့ စွမ်းအားတွေ (ပါဝါတွေ) သွားရှိနေတတ်ပါတယ်။

ဥပမာ လူငယ်တွေ “cool” ဆိုတဲ့ စာလုံးကို သိပ်သုံးကြတယ်။ အဲဒီစာလုံးဟာ မိဘတွေနဲ့ ကျောင်းစည်းကမ်း တွေကို ဖောက်ဖျက်တယ်ဆိုတဲ့ သဘောလည်း သက်ရောက်တတ်ပါတယ်။ တစ်ယောက်နဲ့တစ်ယောက် စိတ်ဆိုးရင်ဖြစ်စေ ဒေါသထွက်ရင်ဖြစ်စေ မသုံးသင့် မသုံးထိုက်တဲ့ ရှောင်ရန်စကားလုံး တဘူး (taboo) တွေနဲ့ တိုက်ခိုက် အော်ဟစ်တတ်ကြတယ်။

ယောကျ်ားတွေ အချင်းချင်းတွေ့ရင် တဘူး တွေနဲ့ ကြမ်းတမ်းပက်စက်စွာပြောတတ်ကြတယ်။ ချစ်သူတွေ အချင်းချင်းလည်း ခံစားချက်တွေ အထွဋ်အထိပ်ရောက်နေချိန်မှာ တဘူးတွေကို သုံးတတ်တယ်။ လူပျက်တွေက လည်း ပွဲတွေမှာ အောက်ပိုင်းပျက်လုံးတွေလို့ခေါ်တဲ့ တဘူးတွေနဲ့ ပျက်လုံးထုတ်ပြီး ပရိသတ်ပွဲကျအောင် လုပ် တတ်ကြတယ်။

ဘာကြောင့် တဘူးတွေများလာရသလဲ

တဘူးတွေကို လူတွေ ဘာကြောင့် စိတ်ဝင်စားကြသလဲ။ အဲဒီလို မဟုတ်တရုတ်စကားတွေကိုပြောဖို့ လူတွေ အများဆုံး စဉ်းစားတတ်ကြတယ်။ ဥပမာ ယဉ်ကျေးတဲ့စကား (euphemisms) တွေနဲ့ ဗန်းစကား (slangs) တွေ ဟာ တဖြည်းဖြည်း တဘူးစကားတွေအဖြစ် ပြောင်းလဲအစားထိုး သုံးစွဲမှုတွေ များလာတာကြောင့်ဖြစ်တယ်။ ဥပမာ လူ့ခန္ဓာကိုယ်ရဲ့ ပခုံး၊ နားရွက်၊ ဒူးတွေမှာ တဘူးအဖြစ်သုံးတဲ့ အပြောင်အပျက်စကားလုံးတွေနည်းပေမယ့် လိင်ပိုင်းဆိုင်ရာ အစိတ်အပိုင်းတွေအတွက် ခေါ်ဝေါ်တဲ့ တဘူးတွေက ရာနဲ့ချီပြီးရှိနေတာတွေ့ရတယ်။

အန္တရာယ်ရှိတယ်ဆိုတာ ဘယ်လို သိနိုင်မလဲ

တစ်ယောက်ယောက်က မပြောမချင်းတော့ မသိနိုင်ဘူး။ ဒါကြောင့်လည်း ဒီလိုစာတွေကို ရေးနေရတာပေါ့။

အန္တရာယ်စကားလုံးတွေကို အဓိပ္ပာယ်အတိအကျ ဖွင့်ဆိုပြပါဆိုလို့လည်း ရချင်မှရတတ်တယ်။ ဥပမာ “buttocks, behind, ass” ဆိုတဲ့ စကားလုံးတွေကို ခန္ဓာကိုယ်အစိတ်အပိုင်းတစ်ခုကို ရည်ညွှန်းတဲ့အနေနဲ့ အဓိပ္ပာယ်တူ သုံးစွဲကြတယ်။ “Buttock”  လို့သုံးရင် နည်းနည်းတော်သေးတယ်။ “Behind” ကနည်းနည်းပိုရိုင်း တယ်။ “Ass” ဆိုတာကတော့ အရိုင်းဆုံးအဆင့်အနေနဲ့ သတ်မှတ်တယ်။ ပိုပြီး ညစ်ပတ်တယ်။ သာမန်အခြေ အနေမျိုးတွေမှာပြောရင် မသုံးကြဘူး။ ကျောင်းတွေမှာ၊ စာရေးသားရာမှာ၊ လုပ်ငန်းခွင်မှာ မသုံးကြဘူး။ မဖြစ် မနေသုံးရတော့မယ်ဆိုရင်လည်း “ass” အစား “buttocks” လောက် “behind” လောက်ပဲ သုံးသင့်တယ်။

အသံထွက်ခေါ်ရတာ ပြဿနာရှာတတ်တဲ့ စကားလုံးတွေ သတိထားပါ။ ဥပမာ “Dick”  ဆိုတဲ့စာလုံးမျိုးပေါ့။ အင်္ဂလိပ်တွေမှာ အဲဒီလိုအသံထွက်ဆင်ဆင် နာမည်တွေအများကြီးရှိတယ်။ သူတို့က ငယ်နာမည်အနေနဲ့ လှောင်ပြောင်ခေါ်ကြတာလည်းရှိတယ်။ Dick ဆိုတာ d ဆိုတဲ့စာလုံးနဲ့ စပေါင်းပါတယ်။ လူတိုင်းသိတဲ့ စကားလုံးပါ။  ယောကျ်ားတွေရဲ့ လိင်အင်္ဂါကိုခေါ်တာပါ။ နာမည်ကိုခေါ်ချင်ရင် ခေါ်လို့ရပါတယ်။ ဒါပေမယ့် လူကြားထဲမှာ dick ဆိုတာကြီးကို မလိုအပ်ဘဲ ထုတ်မခေါ်မိအောင် သတိထားပါ။ Dick ဆိုတာ တဘူးမဟုတ် ပေမယ့် လူကြားလို့မတော်တာကြောင့် သူ့နေရာနဲ့သူ ကြည့်သုံးတတ်ရပါတယ်။

မသိဘဲ သုံးလိုက်မိရင်

ကိုယ့်ပတ်ဝန်းကျင်မှာ ခင်မင်တဲ့မိတ်ဆွေတွေရှိရင်တော့ သတိပေးပြီး ပြင်ပေးလိမ့်မယ်။ မျက်နှာစိမ်းတွေကြားမှာ ရောက်နေရင်တော့ အချို့ကပြုံးပြလိမ့်မယ်။ သူတို့က အင်္ဂလိပ်လို မကျွမ်းကျင်သေးဘူးဆိုတာ သဘောပေါက် တာကြောင့်လည်း ဖြစ်နိုင်တယ်။ ကိုယ်က အရေးပါတဲ့သူတစ်ယောက်ဖြစ်နေရင် နောက်ကွယ်မှာ ကိုယ့်အတင်း ပြန်ပြောစရာ ဖြစ်သွားနိုင်တယ်။ အချို့ကလည်း ကိုယ့်ကို ပညာမတတ်သူ၊ အဆင့်အတန်းမရှိသူ၊ အောက်တန်း စား၊ ကိုယ်ချင်းစာစိတ်မရှိသူ၊ ယုတ်မာသူ၊ ရိုင်းစိုင်းသူလို့ သတ်မှတ်သွားနိုင်တယ်။

အန္တရာယ်များတာတွေသုံးရင် အန္တရာယ်ရှိပါတယ်။ ကိုယ့်ကို ရန်မူ၊ ရိုက်နှက်၊ ဆဲဆိုပြီး တုံ့ပြန်တဲ့အထိဖြစ်နိုင်ပါ တယ်။ ဒါကြောင့် ဆောင်သင့်တာဆောင်၊ ရှောင်သင့်တာရှောင်နိုင်အောင် သတိပြုသင့်တယ်။

Credit: ကိုကိုနိုင်